Bakıda klassik avtomobillərin yürüşü keçirildi - FOTO
Azərbaycan Avtomobil Federasiyası (AAF) mayın 29-da növbəti dəfə klassik avtomobillərin yürüşü və sərgisini təşkil edib.
Axeber.az-ın məlumatına görə, Bakı Şəhər İcra Hakimiyyətinin və “Regional İnkişaf” İctimai Birliyinin dəstəyi ilə keçirilən yürüş Heydər Əliyev Mərkəzinin qarşısından start götürüb.
1982-ci ilədək istehsal olunmuş 150-dən çox klassik avtomobil paytaxtın mərkəzi küçələri boyu hərəkət edib. Onların arasında yürüş üçün qeydiyyatdan keçmiş şəxsi nəqliyyat vasitələri, eləcə də Heydər Əliyev Mərkəzində nümayiş etdirilən klassik avtomobil sərgisinin eksponatları olan nəqliyyat vasitələri yer alıb.
Yürüşdə iştirak edən ən qədim avtomobil 1930-cu ildə istehsal edilən "Ford Model A", ən yeniləri isə 1982-ci ilə aid olan avtomobillərdi. Tədbirdə Azərbaycan Avtomobil Federasiyasının prezidenti, Heydər Əliyev Mərkəzinin direktoru Anar Ələkbərov, Bakı Şəhər İcra Hakimiyyətinin başçısı Eldar Əzizov, tanınmış ictimai xadimlər, elm və mədəniyyət, dövlət və ictimai təşkilatların nümayəndələri, yaradıcı ziyalılar və gənclər, paytaxt sakinləri və qonaqları da iştirak ediblər.
Paytaxt sakinləri və qonaqların diqqətini cəlb edən yürüş Bakı küçələrində nostalji hisslər yaradıb. Yürüşün sonunda klassik avtomobillərin sərgisi olub. Tədbirdə klassik avtomobil sahibləri və avtomobil həvəskarları iştirak edib.
Yürüşdə 1958-ci il istehsalı olan “QAZ M-20 Pobeda” ilə iştirak edən Hikmət Kərimov Trend-ə bildirib ki, 2000-ci illərin əvvəllərindən kolleksiya yığmağa başlayıb.
"Mənim daha iki klassik 1960-cı ilin “QAZ-M-21 Volqa” və 1973-cü il istehsalı olan “VAZ-2103” markalı maşınım var. Burada möhtəşəm bayram ab-havası hökm sürür, hər şey insanların gözəl istirahəti, avtomobil sənayesinin tarixi, qorunub saxlanılan eksponatlar, klassik avtomobillər ilə tanışlıq üçün təşkil olunub. Biz klassik avtomobil həvəskarları olaraq bu hadisənin insanlar arasında yaratdığı maraqdan böyük həzz alırıq", - o, bildirib.
Rasim Knyazov tədbirin ən köhnə QAZ M-1 avtomobillərindən biri ilə qatılıb. Onun avtomobili 1937-ci ilin ilk buraxılışlarındandır və hazırda əla vəziyyətdədir.
"İlk dəfədir ki, yürüş və sərgidə iştirak edirəm. 90-cı illərdən köhnə avtomobillərlə maraqlanıram. Məndə 1949-cu ilin “Moskviç-401” də var. "QAZ M-1"-i mənə bir dostum hədiyyə edib və son beş il ərzində mən, sözün həqiqi mənasında avtomobili əsaslı bərpa etmişəm. Belə bayramlar paytaxtımızı bəzəyir, klassik avtomobil həvəskarları ilə görüşməyə kömək edir, insanların bu sahəyə marağını artırmağa kömək edir.", - Rasim Knayzov deyib.
Azad Kərimov Azərbaycanda klassik avtomobillərin ən böyük kolleksiyaçılarından biridir. Onun 45 ədəd retro avtomobili var. Üstəlik, onları şəxsən təmir və bərpa edir. O, paradda beş avtomobillə iştirak edib, onlardan ən köhnəsi 1937-ci ilin "Steyr" markalı avtomobilidir.
"Uşaqlıqdan ailəmdə belə maşınlara böyük sevgi olub və ömrünün qırx ilindən çoxunu bu cür avtomobillərin kolleksiyasını yığmağa və onları bərpa etməyə, onlara ikinci həyat bəxş etməyə həsr etmişəm. Mən ənənəvi olaraq Azərbaycan Avtomobil Federasiyasının hər zaman ən yüksək səviyyədə təşkil olunan, həyatımıza və şəhər sakinlərinə böyük bayram gətirən avtoyürüşlərində iştirak edirəm. Xüsusilə, bu günəşli günlərdə şəhərin küçələrində retro avtomobillər sadəcə möhtəşəm görünür, paytaxtımızı bəzəyir. Dostlarla, həmkarlarla, qonaqlarla görüşlərdən, maraqlı insanlarla ünsiyyətdən çox məmnunam", - Azad Kərimov bildirib.
“Avroviziya” qalibləri Eldar Qasımov və Nigar Camal cütlük obrazında tədbirə qatılıblar.
"İnsanların sevincli üzlərini görmək, dostlarla ünsiyyət qurmaq, bu qədər nadir avtomobilləri görmək, onlarla gözəl şəhərimizin küçələrində gəzmək mənim üçün böyük xoşbəxtlikdir. Hər şey çox gözəldir!", - Eldar Qasımov söyləyib.
"Mən daim belə tədbirlərdə iştirak edirəm. Hər şey yüksək səviyyədə təşkil olunub", - Nigar Camal öz nəvbəsində bildirib.
“Səs Azərbaycan” vokal şousunun qalibi Emiliya Yaqubova 60-cı illərin obrazında tədbirə qatılıb: "İlk dəfədir ki, belə bir layihədə iştirak edirəm və buna çox şadam, hər şey çox gözəldir. Klassik hər şeyi sevirəm və bu bayram ruhuma oxşayır", - o, bildirib.
İştirakçılar və tamaşaçılar arasında yarışlar keçirilib, qaliblərə Azərbaycan Avtomobil Federasiyası tərəfindən qiymətli hədiyyələr və pul mükafatları təqdim olunub. "Ən qədim avtomobil” nominasiyasında mükafat 1939-cu ilin “Steyr 220” avtomobilinin sahibi Azər Abbasova təqdim olunub. “Məşhurların seçimi” nominasiyasında qalib 1942-ci ildə istehsal edilən “Horch” minik klassik avtomobilinin sahibi Eduard Qurbanov olub. “Ən rəngarəng retro geyim” nominasiyasında 1-ci yerin sahibi Emiliya Yaqubova, 2-ci yerin sahibi Toğrul Salimov, 3-cü yerin sahibi isə Aslan Səlimov olublar.
“Ən qeyri-adi retro geyim tərzi” üzrə mükafata Nigar Camal layiq görülüb.
